L’ANTROXU
TRADICIONAL D’UVIÉU
proyeutu de recuperación – 2017
Paraíso Local Creativo propón recuperar nel barriu Antiguo l’antroxu tradicional d’Uviéu. Obra en procesu que pasa pola conocencia de les mazcaraes d’iviernu n’Asturies, l’estudiu de cuadros d’Evaristo Valle, el trabayu de campu nel Conceyu a la gueta la memoria de vieyes y vieyos que recuerden daqué del antroxu carbayón escaecío dende la República, prohibío pol franquismu y tovía non retornao a la nuestra ciudá. Facer personaxes, mazcaritos, antroxos, coples, comedies, dances del osu, folixa, fartura, música ratonera y sacar a la cai una comparsa pa correr l’Antroxu 2017 a la moda les mazcaraes de les nuestres güeles y los nuestros güelos.
Antroxu ye’l nome asturiano nel Conceyu d’Uviéu (en dellos otros: Antrueyu, Antruidu, Antroidu, Entroido). Remanez del llatín introitus (entrada, entamu), yera entrada al añu nuevu. Si falamos de la memoria escaecida, de recuperar l’antroxu tradicional, nun podemos facelo n’otra llingua. La pallabra crea’l mundu. Y l’antroxu de vieyo nun pue dicise d’otra manera. El mazcaritu o marutu fala n’asturianu o queda mudino, saca la llingua perbaxo’l caretu y fala con aspavientos pa que naide nun-y conoza la voz.
-¿Mazcarita, conócesme?…
A Uviéu tornó nos años 80 el Carnaval. Antroxaron les cais, pero siguieron escaeciendo los vezos. Vineron les modes foriates de los Carnavales de Río, de Tenerife, de Cádiz o de Venecia. Les folixes son prestoses, pero los festeyos son formes d’aculturación. Disfrazar, disfrácense guapamente. Pero nun antroxen.
Antroxar ye otra cosa.
LES MAZCARAES D’ANTROXU
Los antroxos y mazcaraes remóntense a la dómina medieval. Les caberes versiones n’Asturies son del sieglu XIX y primer mitá del XX. Yá taben pa morrer, prohibióles la Dictadura y perdiéronse nes villes y ciudaes. Cola Democracia los conceyos rescataron l’Antroxu, pero perdieron la tradición.
Una decena mazcaraes sobrevivieron, cuasi toes recuperaes:
Los Sidros y Les Comedies (Valdesoto, Siero) El Guirria (San Xuan de Beleño, Ponga) Os Reises d’El Valledor (Ayande), Os Reises de Tormaleo (Ibias), Los Aguilanderos de Xedré o La Puela, Los Aguilandeiros de San Xuan de Villapañada (Grau) y Los Guilandeiros de Tinéu. Anguaño ta dalguna más en procesu de recuperación: Los Mazcaritos en Maliayo, o Los Payones en Grau.
Los Bardancos de Casu, Las Comparsas de Quirós, Los Zamarrones de Ḷḷena, o Los Zaparrastros d’Ayer, tán estudiaes, sábese cómo yeren, pero hasta que les recree dafechu la xente tán aselando na hibernación.
ANTROXU EN CUARESMA
En 1982, col primer Ayuntamientu socialista, recupérase n’Uviéu’l carnaval popular, col nome d’Antroxu, na Plaza del Fontán. Asociaciones vecinales y artistes collaboren cola fiesta. La idea de celebrar l’Antroxu espárdese pelos colexos, que son los que lo faen espoxigar.
En 1995, con Gabino de Lorenzo, camuda’l tiempu del Antroxu n’Uviéu pa que nun coincida colos d’Avilés y Xixón. Asina, vien como coche escoba recoyendo les charangues de les otres ciudaes pal desfile del carnaval.
Eso val como fiesta, pero como antroxu faise na Cuaresma y fuera de tiempu. Cuando yá pasó la povisa, vien l’Antroxu d’Uviéu cola folixa.
Los cuatro dies d’antroxu
L’antroxu entama’l sábadu o Domingu Lardeiru col plante la Vieya. Y fina’l Miércoles de Ceniza pela mañana col ritu de “quemar la vieya” o “enterrar la sardina”. Los cuatro díes d’antroxu son:
«Sábadu frixueleru
domingu larderu
llunes gordu
y martes d’antroxu»
L’ANTROXU D’UVIÉU
La mazcarada escaecida.
Uviéu tenía nos sieglos XVI y XVII un antroxu tradicional. Les célebres mazcaraes d’iviernu en febreru son l’orixe del nuesu Antroxu. Y nun se facíen namás nes aldees: les pintures d’Evaristo Valle danmos testimoniu de so vezu n’Uviéu. Sabemos del Obispín, una mazcarada dientro de la propia Catedral de San Salvador ente’l 18 d’avientu y los Santos Inocentes, o de personaxes como La Destrozona, un home travistíu de muyer que daba escobazos a degüellu.
ANTROXU Y CARNAVAL
El Carnaval de la burguesía de Vetusta
Pola documentación municipal, o la obra del Padre Feijoo, sabemos que l’antroxu uvieíno taba vivu a finales del sieglu XIX y principios del XX.
En sieglu XIX la burguesía facía’l baille de Carnaval nel Casinu y Salón Bombé, d’etiqueta y non de mázcares. Facíase’l llunes de Carnaval. La Regenta cuéntalo en 1899. Antroxu y Carnaval celébrense en paralelo. El pueblu facia burlla de los señorones, cures y militares. Les muyeres empecipien a marutase.
“Paseo del Bombé muy concurrido en Martes de Carnaval. Había más mujeres disfrazadas con la máscara puesta, se tornan más calladas “(sic)
Correo de Asturias (1891), Carmen Ruiz- Tilve.
Col sieglu XX vienen los “desfiles d’antroxu” pela cai Uría con carroces engalanaes (Valle pintóles na cai Corrida, Xixón). Los dos antroxos, el popular y el burgués axuntaben el martes d’antroxu col “entierru la sardina” nel Paséu los Álamos.
“Ana se quedó sola. Desde el balcón abierto de su tocador se oía la música lejana del Paseo Grande donde se celebraba el carnaval”
La Regenta, Leopoldo Alas, 1899
Fermín Canella cuenta en 1887 que los antroxos y carnavales, anque viníos a menos, siguíen siendo mui concurríos n’Uviéu. Habíen desapaecío costumes populares como los tiznes, los bigotes, les batalles de güevos o agua del regatu.
Las comparses a fines del XIX yeren poques, pero de sonadía. Tola ciudá participaba, especialmente la mocedá. Ente los nomes taben los diablillos, los zuavos, los húngaros, los árabes, a les que se xuntaben los trovadores y la tuna de la Universidá. Daquella yá taba perdío l’Entierru de la Sardina.
Fermín Canella. El libro de Oviedo, 1888.
Evaristo Valle pinta’l Carnaval burgués y l’Antroxu popular. Abanicu pal Baile de la Asociación de Prensa, 1917.
PROHIBICIONES
La represión del Antroxu d’Uviéu
Ordenances Municipales
“Por orden real acuerdan poner coto al carnaval, una costumbre de vestir disfraces, traída de «otras naciones diferentes» que es una ofensa a la majestad divina”.
Alcuerdu municipal (1716) Archivu Municipal Uviéu
Prohibición del Antroxu y Carnaval pola dictadura de Franco en 1937
PERSONAXES Y COMEDIES
Comedies
- EL VIEYU Y LA VIEYA, EL CIEGU, EL TONTU…
- LA PARIDA (escenifica un partu)
- EL XUICIU (a la Vieya, a la Sardina…)
- El PELELE
- LA DESTROZONA
- QUEMAR LA VIEYA o ENTERRAR LA SARDINA
Aiciones
- TIRAR AGUA, CENIZA, GÚEVOS
- DAR VEXIGAZOS
El Vieyu y la Vieya o Comedia del Ciegu.
(Les Comedies, Valdesoto)
LA DESTROZONA
La Destrozona ye’l personaxe más famosu del antroxu d’Uviéu, el que ta meyor documentáu y pasó a la hestoria. Tenía fama de dar tiyerones, tener la llingua llarga y nun dexar títere con cabeza. Nadie nun se llibraba de les sos coples satíriques, con mofles y escobazos.
LA DESTROZONA
NA PLAZA L’AYUNTAMIENTU
Cipriano el hojalatero,
Evaristo Valle 1945
El pregón de la Destrozona na Plaza l’Ayuntamientu va facer mofla y rechifla de les autoridades del Conceyu (“a quien correspuenda”), del gobiernu a la oposición municipal. El/la mandamás que se pique, que rasque, que la Destrozona da como pa fregar.
“Antroxando”, (hacia 1930)
obra del escultor candasu Antón
la Destrozona y la so pareya: El y ella.
La inversión de xéneros.
La destrozona –un home antroxáu de muyer- diba acompañada del so home –una muyer antroxada d’home.
La destrozona no destrozaba nada.
Hacía el carnaval por su cuenta.
Con una escoba usada,
un pañuelo en la cabeza,
una blusa y una falda
de su abuela
un delantal alpargatas
y dos melones por tetas.
Era un muchacho u obrero
el que así se disfrazaba.
Mascarita destrozona
era un muchacho con faldas.
Ahora lo llaman travesti,
entonces (Lavapiés zona)
lo llamaban destrozona.
Gloria Fuertes. “La destrozona”
XUEVES DE COMADRES
“Jueves de Comadres”, Evaristo Valle.
El Xueves de comadres ye l’últimu xueves enantes del Antroxu. Celebrábase en munchos sitios d’Asturies; quedó la tradición en Xixón y na Pola Siero. Axuntábense madres, madrines, fíes, afiyaes a pasar la tarde charrando y gastando bromes, amás de preparar una bona merienda, casadielles y teresites con xocolate o café. Una fiesta de muyeres que xuntábense pa divirtise, ensin la presencia los homes, celebrando la so lliberación. L’orixe podría tar nes Compitales romanes que, per unos díes, facíen el mundu al revés. Les comadres derivaron angüaño a les cenes y espeutáculos de boys. Hai que da-y una vuelta ensin perder tradición, a lo que ye la esencia: una fiesta de paisanes. Mientres faen puntu de calceta acasu podríen falar del cambéu de mentalidá: de la igualdá y multiplicidá de xéneros, de los bonos tratos, de la cultura cuer… La mirada feminista tien de facer llabor, amás d’axuntar un piñu muyeres pal Antroxu.
EL PELELE
Figura fecha de paya o trapos que nos antroxos colgábase de los balcones o manteábase como chivu espiatoriu. Los neños insultábenlu y maltratábenlu hasta la hora de da-y matute, enterralu o quemalu. Ye un personaxe de carnaval, non sólo n’Asturies, en toa España.
El Pelele, Francisco de Goya, 1792.
Vieya costume de les muyeres (s. XVIII) yera mantear el pelele, muñecu de paya en figuratu d’home, faciendo risión y cantando-y coples:
El pelele tá malu,
¿qué-y daremos?
Agua de caracoles,
que críe cuernos.
¡Arriba con él!
Dientro la inversión del xéneros del Antroxu simbolizaba’l poder de la muyer sobre l’home. La costume caltúvose hasta mediaos del s.XX.
MADAMES Y GALANES
La Madama ye un home tresvistíu de muyer.
Les niñeres y los soldaos
Los quintos celebraben les sos despidíes con antroxos y aguinaldos. Los soldaos cortexaben a les niñeres nel Paséu del Bombé, yera una imaxe típica. La zarzuela fizo’l restu. Incorporóse al antroxu popular d’Uviéu nel sieglu XIX.
La madama y el soldáu, Os Reises.
L’OSU Y L’AMU
Esta pareya yera tradicional en munches zones d’Asturies.
L’osu, l’amu y el neñu.
L’osu y l’amu. Antroxu de Villamayor, 1915. Semeya, Montoto.
RECUPERAR PERSONAXES
LOS DIABLECOS. (DIABLURES Y TRASTAES) Tradición popular de la mitoloxía asturiana: los diablecos, los trasgos…El diablu ta en Les Comedies de Valdesoto.
TIZNAOS con corchu quemao o sarriu (hollín) de la cocina o chimenea.
BIGOTES, TIZNES, COLORETES, NAPIES DE PEGA
LOS ZUAVOS (SOLDAOS)
LOS HÚNGAROS (XITANOS)
LOS ÁRABES (MOROS).
ZAPARRASTROS
FELPEYOS (VESTIDOS DE SACOS)
ENSABANAOS (los del Sábanu)
LES DESTROZONES (ESCORRIENDO A LA XENTE CON ESCOBA).
Os Reises del Valledor
El Choqueiro, A Cardadora, El Rodalo, A Basoira, El Maragato, A Maragata, Os Guapos, Os Feos, El Soldao, El Valenciano, As Madamas, músicos y A Gocha (que diba ensin mazcarita col sacu).
Murgues y comparses
Nesta folixa nun faltaben les coples de la tradición oral. Les más d’elles anónimes, anque tamién sabemos l’autoría de dalgunes, como les d’Antón el Coque, recreaes por Jerónimo Granda en 1977.
Murga de Cazadores, Uviéu. El de la guitarra ye “El Coque”
Antroxando pallabres…
Nesta folixa nun faltaben cantares y coples de la tradición oral. L’Antroxu escontra la Cuaresma. Fame o fartura, barriga vacía o llena. El fueu y el fríu. L’añu que muerre y l’añu que ñaz. L’iviernu de lo qu’un día foi primavera: la mocedá y la vieyera. Ye’l ciclu mesmu de la vida.
La xuventú ye folixa, ye diversión, ye folgueta.
Les penes y desengaños quédense pa la vieyera.
Vosotros sois l’Antroxu, nosotros la Cuaresma.
Versos recitaos por Araceli Noval, vecina d’Oles (Villaviciosa)
Xigantones na fiesta de San Antonio, Cangues d’Onís
Coples d’antroxu
Folixa picardiosa
Nel Antroxu, remociquen los vieyos y avieyen los mozos. Nun hai más que ver cómo antroxen y les coples que se tiren:
Les chavalines d’Uvieo
muncho lluxu y fantasía
zapatos de venti duros
y la barriga vacía.
(Poema popular carbayón).
Pal Antroxu Fartón vamos falar con Milio del Nido que nos faiga frixuelos y nos cuente cuentos y cosadielles d’antroxu, el sábadu frixueleru. Platos d’antroxu hailos a fartar nestes fiestes en chigres y restoranes de la ciudá (pote asturianu, frixuelos, picatostes…), entós proponemos:
- Concursu de Llambiotaes Convocaráse un concursu llambiotaes en collaboración con dalgún chigre, convidando al vecindariu a participar.
Antroxu de Villamayor (Piloña). Faciendo churros. 1915. Semeya Montoto.
- Fame y Fartura L’antroxu comparte. “Fame qu’espera fartura, nun ye fame, ye bayura”. El domingu, tres del Antroxu fartón, vamos donar lo que sobre -que será abondo- a los Desayunos Solidarios de Ca Beleño.
TIEMPU D’ANTROXU
Díaz de Orosia, Carnaval en Oviedo
Dies del Antroxu tradicional d’Uviéu:
23 febreru Xueves de comadres tarde y nueche
25 febreru Sábadu frixueleru tarde y nueche
26 febreru Domingu lardeiru mañana, tarde y nueche
27 febreru Llunes gordu nueche
28 febreru Martes d’antroxu nueche y madrugada
L’Antroxu tradicional diba percorriendo les cases del pueblu, picando a les puertes, faciendo trastaes, y recibiendo los dones del vecindariu –güevos, chorizos, dulces, sidra, vinu- que diben fartando, bebiendo o guardándolo nel sacu que llevaba la goxa al llombu o na burra. Esto yera correr l’antroxu.
L’itinerariu va pasar armando folixa per tol barriu:
- Pelos comercios tradicionales, les tiendes de comestibles.
- Pelos chigres y bares. Boca a Boca, El Mateín, Roma, Ca Beleño…
- Peles cases onde abran la puerta o tiren dalgo del balcón –que nun seya l’agua va– pa meter a vecines y vecinos na folixa del antroxu.
- Pelos espacios alternativos: Paraíso, Partycipa, L’Arcu la Vieya, La Llegra, Decero, El Manglar…
- Escorriendo a los neños y neñes, es y chavalería que venga detrás, con idea de provocar a la xente menudo y la mocedá.
PERCORRÍU DEL ANTROXU
ESPACIOS (peatonales)
La Cai Paraíso
Los Postigos Altu y Baxu
La Cai San Xosé
La Corrada l’Obispu.
La Plaza’l Sol.
La Plaza l’Ayuntamientu
La Plaza’l Paragües
Trescorrales
El Fontán
La Calleja la Ciega
La Cuesta la Noceda
La Cai Gascona
L’arcu la Vieya ye como nomamos al arcu iris n’asturianu. ¿Quién yera “La Vieya”? Una vieya diosa que representa les fuercies de la natura y apaez en finxu’l cielu con un arcu máxico de colores cuando escampla la truena y dexa la tierra moyao pa que bilte la collecha.
Marutaos nesos personaxes d’Antroxu tán vieyos mitos ancestrales. La Vieya del Antroxu representa l’añu qu’acaba, el ritu del añu nuevu. “Plantar” o “colgar La Vieya” facíase al entamu del Antroxu. “Enterrar” o “quemar la Vieya” yera’l ritu del fin del Antroxu.
El Postigo ye’l llugar pa plantar la Vieya, Un símbolu del Antroxu encaramáu a la cerca d’Uvieu, delantre’l comerciu xustu “L’Arcu la Vieya”. Un pelele de paya vistío con ropa vieyo ye “La Vieya”, que va guardar la puerta de la ciudá los tres díes d’Antroxu.
El nome “Arcu la Vieya” ye paxareru y préstase a renovar la tradición colos colores de la bandera gai ooooooo, lo que daría pie a la perspeutiva cuer na musicoloxía y etnografía asturiana.
La comedia acaba’l Martes d’Antroxu, cola llectura del testamentu de La Vieya o l’Entierru la Sardina. Acabóse lo que se daba; col cleru topemos. La ilesia nunca nun vio con bon güeyu estes festividaes escandaloses, tentó d’acutales col Miércoles de Ceniza.
- L’Entierru la Sardina: el bacalao no alto d’un palu, señala’l tiempu de penuria. Ta prohibío comer carne na Cuaresma.
Atrás queden los díes de fiesta, de fartura y escesos. Llega la Cuaresma (Quadragesima, periodu de 40 díes enantes de la Selmana Santa), qu’empecipiaba’l Miércoles de Ceniza, momentu que los fieles tornaben a la ilesia, ayunando o renegando de la carne. D’ehí la pallabra carnaval, del carnevale, de carne (carne) y levare (quitar). Queda la RASPA.
RASPA. Red Asturiana de PerformAcciones
TALLERES D’ANTROXU EN PARAÍSO
MÁZCARES, ANTROXOS, MÚSICA Y BAILLE
PRECEDENTE ye’l proyectu Paraísurural (2014) nel que se ficieron talleres artísticos nel pueblu de Vallinaoscura (Villaviciosa) con un taller de máscares tradicionales y una recoyida de datos orales ente vecines y vecinos del pueblu, nel que los participantes de más edá ficieron memoria de “Los Mazcaritos”, los antroxos rurales onde poníen mázcares y “picornios” pa correr el campu y los pueblos, picando a les cases, que-yos daben “fayuelos” (frixuelos).
Taller de Máscares de Paraísorural (Vallinaoscura, Villaviciosa, 2014)
Vecinos y vecines faciendo máscares y recordando los antroxos de la neñez.
OXETIVU: Poner en valir la raíz cultural del Antroxu d’Uviéu y la so función, lúdica, participativa y reivindicativa del mediu rural y urbanu tradicional.
TALLERES D’ANTROXU
Materiales p’antroxar
Sacos d’arpillera o cáñamu
Lloqueros o cencerros (collarones con esquila).
Sombreros
Llenzu morenu. Loneta.
Mantes vieyes. Colches. Sábanes vieyes
Trapos vieyos.
Teles y xéneros.
Escobes de piornu.
Una cacheira o cachucha del gochu (pal Domingu Fartón)
Chorizos en riestra colgaos d’un palu
Llana d’oveya (blanca o prieta)
Fueyes de maizu
Palos y pértigues
Facer zancos.
Mataderu
Cuernos de vaca
Vexigues (hinchales y colgales a teyavana)
Les pelucones, bigotes de pelu, llana oveya (o barbes del maíz.)
Música ratonera:
Matraques
Carraques
Tarrañes (dos palos como castañueles)
Castañueles.
Chiflos, xiblatos.
Turuyes.
Botelles d’anís.
Sartenes, potes de fierro.
Cuchares, garcielles…
Platos d’aluminiu pa facer platillos.
Bocines de coche.
Pa dar la murga.
Gaita
Tambor
Panderos, panderetes
Instrumentos de cuerda. ¿curdión?
Sacar ritmos, basaos en música popular.
O simplemente facer ruíu.
Baille
Deprender a baillar asturianu
Baille “agarrao”.
Pasudoble
El baille l’osu
Mázcares.
Papel de periódicu.
Cartones. Papel d’embalar
Güeveres de cartón (pasta papel)
Cola d’empapelar.
Cola de coneyu. Cola de pescao.
Pintures (pigmentos)
Escayola o yeso…
Pelleyu o cueru.
Cuerda. Cáñamu o bramante.
Estopa
Alquil (anacronismu).
Amazcaritase y pintarraxase
Fariña o talco
Corchu quemao
Colorete
Barra de llabios.
Betún.
Ropa vieyo
Camises
Calzones. Ropa vieyo.
Faldamentos
Zapatos
Alpargates de Nava (El Fontán)
Madreñes
Ropa militar (antigua)
Correaxe militar (de cuero)
Gorra cuartelera
Pañoletes
Mantón o echarpe de la güela…
Pa tirar:
Fariña.
Güevos
Ceniza de cocina…
(Papelinos de periódicu de colores, non confeti)
Asegún noticia en prensa (16-09-2016), Uviéu va tar na Feria Internacional Máscara Ibérica de Portugal en mayu del añu 2017 en Lisboa. Nesti alcuentru desfilen les mazcaraes recuperaes n’Asturies, Galicia, Lleón, etc. La presencia d’una mazcarada del antroxu d’Uviéu permitiría non sólo facer promoción turística o gastronómica, sinón tamién amosar el patrimoniu inmaterial de la ciudá nesa manifestación etnográfica, artística y cultural.
PATRIMONIU CULTURAL INMATERIAL.
L’antroxu ye un patrimonio cultural inmaterial, como diz la UNESCO. Ye una manifestación cultural que se tresmite ente xeneraciones, recreao poles comunidaes, ye un ritu n’interacción cola natura y tien pa la ciudá d’Uviéu y pa la comunidá d’Asturies un sentimientu d’identidá y de tradición. Una recreación del antroxu tradicional d’Uviéu ente les comunidaes vecinales, culturales y hosteleres. La idea d’una cultura popular con identidá de barriu na ciudá.
UNESCO
Intangible Cultural Heritage
VALORES SOCIALES DEL ANTROXU TRADICIONAL
Paraíso ye una asociación cultural que tien un compromisu social. Tamos pola función social de les artes. Apostamos por renovar les fiestes de la ciudá, por da-y vida a cais y places con una cultura de barriu, solidaria y folixera. Les nueses actividaes tienen una ética y una estética de la fiesta.
- Integración de persones mayores. El proyeutu Antroxu trata de recuperar valores etnográficos identitarios, perdidos na ciudá. La investigación de campo mirará pa la memoria de les persones mayores, depositaries d’esa tradición. Son elles les que tienen el nuesu patrimoniu inmaterial.
- Integración de la mocedá del barriu y xente activo y de la ciudá. Ha facese una convocatoria pa talleres del antroxu y otra pa la Mazcarada d’Uviéu.
- Integración de persones inmigrantes na cultura autóctona asturiana. Lloñe de separtar o facer el caldu gordu de la globalización, apostamos pol diálogu de cultures. Los carnavales son propios de toles cultures del mundu, asina convidaremos a Asturias Acoje, asociación del barriu cola que trabayamos nel chiringo La Mateína.
- Tan importante como’l resultáu creativo, ye’l procesu participativo.
PROYECTU DE RECUPERACIÓN DEL ANTROXU D’UVIÉU
DESCRIPCIÓN ESPLICATIVA
Recreación del Antroxu tradicional. Febreru 2017
- Estudiu etnográfico-histórico
- Trabayu de campo (entrevistes y grabaciones, posible pieza audiovisual documental)
- Involucrar a otres personas y coleutivos asina como a locales comerciales y hosteleros.
- Estudiu y creación de personaxes del Antroxu d’Uvieu
- Talleres:
- Máscares y trastería
- Costura y construcción d’elementos
- Música y danza
- “Correr l’Antroxu”. Itinerarios pol Antiguo y alredores.
- Charra en Museo de Belles Artes so’l cuadru d’Evaristo Valle y la so rellación col Antroxu d’Uviéu y les mazcaráes d’iviernu.
- DÍES:
- XUEVES 23: Xueves de comadres. Xuntanza-merienda-fiesta de muyeres en Paraíso LC.
- SÁBADO 25: Sábadu frixueleru. Espaciu esterior, “Plantar la Vieya”. Primer salida d’Antroxu. Actividaes antroxeres y gastronómiques (concursu de llambiotaes). Amuesa de recetes típìques. Tarde y nueche.
- DOMINGU 26: Domingu lardeiru: Correr l’Antroxu, 1er itinerariu zona 1, Uviéu Antiguo. Mañana, tarde y nueche.
- LLUNES 27: Llunes gordu. Correr l’Antroxu, 2º itinerariu zona 2, Uviéu Antiguo. Nueche.
- MARTES 28: Martes d’Antroxu. 3er itinerariu zona 3, Uviéu Antiguo. Noche y madrugada. Entierru la sardina.
PARAÍSO LOCAL CREATIVO
Los espacios de coworking como Paraíso respuenden a les necesidaes del arte d’anguaño, qu’axunta artistes de disciplines estremaes pa compartir trabayu en comuña. La crisis tien estes soluciones de supervivencia, necesidaes non atendíes poles instituciones nin pola industria cultural o’l mercáu del arte. Formes d’autoxestión que-yos dan vida a movimientos artísticos emerxentes na ciudá. La vida cultural ta refuxao tres de la muralla medieval, arreglando un garaxe como espaciu multidisciplinar. La investigación de Paraíso mira pa dos frentes: l’artísticu y el social. Como espaciu de creación artística de vanguardia desarrolla la cultura local y abre redes con otros espacios creativos a nivel nacional o internacional. Paraíso Local Creativo lleva cinco años de actividá y pola so trayectoria ye reconocío nos ambientes culturales y underground d’Uviéu.
Paraíso ye un referente na producción de talleres, performances, intervenciones urbanes y eventos artísticos, teatrales o musicales alternativos. Actividaes que cuenta siguir faciendo cola metodoloxía de llaboratoriu abiertu d’arte contemporáneu y social implicáu nel barriu y la ciudá.
Uviéu, 16 de payares de 2016.